Ang Paraan ng Pagluluto ng Spiessbraten

Bilang karagdagan sa mga sumusunod na sangkap sa pagluto ng “Original Obersteiner Spiessbraten,” kinakailangan ng partikular na pansin sa kalidad at oras ng pagluluto.

Mga Sangkap:
Karne ng baka: Pang-ihaw na baka, lomo, tadyang, gamitin lamang ang malambot na karne
Baboy: lomo, pork chop o pang-liempo, hamon, batok
Panimpla: mga sibuyas, asin, paminta at bawang

Mangyaring Tandaan:
Ang karne ay dapat na 3-5 cm ang kapal, hilaw na timbang sa bawat tao ay humigit-kumulang 300-400 gramo

Paraan ng Pagluluto:

Humigit-kumulang 6-10 na oras bago ang pagluluto, budburan ng asin at paminta ang karne. Balatan at hiwain sa gitna ang mga sibuyas. Timplahan ang mga ito ng asin at paminta. Takpan ang karne kasama ang mga tinimplahang sibuyas.

Painitin ang pugon gamit ang kahoy na Beech o Oakwood.

Bago ang paglalagay ng karne sa ihawan, lagyan ito ng kaunting sibuyas at ilang piraso ng bawang.

Ilapat ang karne sa grill at sandaling ihawin ang magkabilang panig nito gamit ang malakas na apoy upang selyohan ang mga “pores” o maliliit na butas ng karne. Pagkatapos, hinaan ang apoy at patuloy na ihawin. Huwag gumamit ng tinidor upang baliktarin ang karne upang maiwasan ang pagkawala ng “juice” o katas nito. Ang kabuuang oras ng pagluluto ay humigit-kumulang 20-30 minuto depende sa bigat ng karne.

Tandaan:
Ang karne ay matutuyo kung ito ay iihawin na masyadong matagal. Ang „Spießbraten“ ay karaniwang handa na kapag ang “juice” o katas nito ay kapansin-pansin sa ibabaw ng karne.

Sa 100 na mga paraan upang ihanda ang „Spießbraten“, ito ang ika-99 na bersyon, o…

^©Spiessbraten made in Oberstein, Zum Alten Goten. Isinalin sa Filipino ni: Ma. Elissa Valino, Abril 2014.